MWAMBUSI ASEMA TUPO TAYARI KWA LIGI KUU TZ BARA MSIMU UJAO.

Baada ya kumalizika kwa msimu wa ligi kuu tanzania bara kila timu imejipanga sawasawa katika harakati za usajili pamoja na maandalizi Kabambe ya msimu mpya wa ligi kuu  unaotarajiwa kuanza kutimua vumbi Agosti 24 mwaka huu.

Ambapo timu mpya katika ligi kuu na kipenzi kwa wakazi wa jiji la  mbeya Mbeya City ya jijini Mbeya wameanza kujiweka chimbo kujifua chini ya kocha wao mkuu Juma Mwambusi.

Akizungumza na mkali wa dimba Kocha Mwambusi amesema wachezaji kutoka mikoani wameanza kuwasili kuanzia jana, huku akitanabaisha kuwa anajipanga kuongeza wachezaji wachache katika kikosi chake alichotoka nacho  ligi daraja la kwanza msimu uliopita.

“Wachezaji wengi ni walewale, nina mpango wa kuongeza nyota wachache, wengi nitawapandisha kutoka kikosi B, lakini wachezaji wengi waliopandisha timu ligi kuu nimewaacha ila kuna nafasi chache nitaziba hivi karibuni”. Alisema Mwambusi.

Mwambusi amesema katika kikosi chake hana tabia ya kuwapa majina wachezaji kwa kuwapa uhakika wa namba, kwani falsafa yake ni kuchezesha wachezaji wote bila kujali majina yao.

“Mimi siku zote falasafa yangu ni ileile, wachezaji wote wanaofanya vizuri wameweza kupata nafasi hiyo kwa sababu walipewa nafasi ya kucheza, hivyo nitawapa wachezaji wote nafasi ya kucheza ili waongeze uzoefu”. Alisisitiza Mwambusi.

Kuhusu kusajili wachezaji wenye uzoefu mkubwa na mikikimikiki ya ligi kuu, Mwambusi alisema hana mpango wa kusajili wakongwe kutokana na kikosi chake kuwa na vijana wengi ambao wanafanya vizuri.

“Mbeya City ina kikosi bora cha vijana, ninavyozungumza hapa kipo mkoani Iringa wilaya ya Mufindi kushiriki michuano ya kombe la Muungano Mufindi, ni kikosi kizuri sana, kinaongozwa na kocha wangu msaidizi Maka Mwalwisyi ambaye anafanya kazi nzuri. Ni matumaini yangu hawa vijana ni msingi mkubwa wa klabu yangu na watapewa nafasi”.

Mwambusi alisema kikosi chake kinahitaji kujifua kwa nguvu kuhimili mitanannge ya ligi kuu, kwani ligi ya Tanzania bara imekuwa na ushindani mkubwa sana.

“Ligi imebadilika sana, niliifundisha Prisons miaka ya nyuma, sasa naona mambo yamebadilika sana, lakini nina uhakika kwa uzoefu wangu nitajipanga vizuri na kupambana hadi mwisho”. Alisema Mwambusi.

Mbeya City ni miongoni mwa timu tatu zilizopanda ligi kuu soka Tanzania bara msimu ujao, wakati nyingine ni Maafande wa Rhino Rangers ya Tabora, na Ashanti United ya Dar es salaam.

Msimu uliopita timu tatu za Africa Lyon ya Dar es salaam, Toto Africans ya Mwanza na Polisi Morogoro zilishuka daraja na sasa zinaendelea na mazoezi ya kujiandaa na msimu mpya wa ligi daraja la kwanza.

SERENA WILLIAMS ATOLEWA NJE KATIKA TENESI MICHUANO YA WIMBLEDON

MWANADADA nyota dunia katika tenisi kutoka Marekani, Serena Williams ametolewa nje katika michuano ya Wimbledon baada ya kukubali kipigo kutoka kwa Sabine Lisicki wa Ujerumani kwa 6-2 1-6 6-4. Williams ambaye mbali na kupewa nafasi kubwa ya kunyakuwa taji hilo pia alikuwa bingwa mtetezi wa michuano hiyo aliyonyakuwa mwaka jana. Kwa upande mwingine bingwa wa zamani wa michuano hiyo Petra Kvitova alifanikiwa kutinga hatua ya robo fainali ya michuano hiyo baada ya kumgaragaza Carla Suarez wa Hispania kwa 7-5 6-3. Mashindano ya Wimbledon mwaka huu yamekuwa sio mazuri kwa nyota wengi wanaoshika nafasi za juu katika orodha za ubora wa mchezo huo duniani baada ya Maria Sharapova anayeshika namba mbili kuenguliwa katika mzunguko wa pili huku Victoria Azarenka anayeshika namba tatu yeye akijitoa baada ya kupata majeraha.

ARSENAL WAMTAKA KIPA JULIO CESAR WA QPR ILIYOSHUKA DARAJA"

WASHIKA Bunduki wa jiji London Club ya Arsenal itaangalia uwezekano wa kukamilisha usajili wa kipa namba wa Brazil na klabu ya Queens Park Rangers, Julio Cesar baada ya Kombe la Mabara.

Arsene Wenger anataka kipa mzoefu atengeneze ushindani kwa Lukasz Fabianski na Wojciech Szczesny.

Mazungumzo baina ya wawakilishi wa Cesar na viongozi wa Gunners tayari yamefanyika, lakini hayajamalizika kwa kuwa kipa huyo yupo kwenye majukumu ya kimataifa.

ARSENAL sasa inatarajiwa kumaliza dili hilo mara moja tu, baada ya kubainika Roma ya Italia nayo imeingia kwenye mbio za kuwania saini ya Cesar.

Kipa huyo wa kimataifa wa Brazil ambaye yupo huru kuondoka Loftus Road kufuatia kushuka kwa QPR hadi Championship, anataka kubaki London ambako amezoea maisha tangu awasili msimu uliopita akitokea Inter Milan.

Na The Gunners – ambayo inatumai kukamilisha pia usajili wa Gonzalo Higuain wiki ijayo, baada ya kocha wa Real Madrid, Carlo Ancelotti kufungua njia kwa mshambuliaji huyo kuondoka  Hispania – inajiamini dili hilo litakamilishwa baada ya Fainali ya Kombe la Mabara Jumapili.

Wenger alitaka kusajili kipa wa Stoke, Asmir Begovic na wa Liverpool, Pepe Reina lakini, licha ya kuwa na fungu la bajeti ya usajili la Pauni Milioni 70, kocha huyo wa Arsenal ameona  hana sababu ya kutumia fedha nyingi kwa ajili ya kipa.

Rangers itasikiliza ofa ya kiasi cha Pauni Milioni 2 kwa Cesar, wakati mshahara wake wa Pauni 70,000 kwa wiki halitakuwa tatizo kwa The Gunners, ambayo imetuma waangalia vipaji wake nchini Brazil kumuangalia Cesar anachokifanya katika Kombe la Mabara.

Pamoja na mpango wa kuwasajili Cesar na Higuain, The Gunners pia wanataka kumsajili beki wa Swansea, Ashley Williams na kiungo wa Everton, Marouane Fellaini. Lakini masuala ya kifedha yanatia saka kama Arsenal itaweza kusajili wachezaji wote hao.

Hadi sasa, Arsenal imegoma kumpa Fellaini mshahara wa Pauni 100,000 kwa wiki na pia imeshindwa kufika dau la Pauni Milioni 24 za kumnunua.

Amekosekana? Arsenal inataka kuwasajili Marouane Fellaini

MBEYA MWENYEJI WA NETIBOLI TENA KWA MARA YA PILI MFULULIZO".

Jiji la Mbeya kwa mara ya pili mfululizo,litakuwa mwenyeji wa ligi kuu ya Netiboli taifa ambapo  naibu Waziri wa Elimu na Mafunzo ya Ufundi, Philip Mulugo anatarijiwa kuwa mgeni rasmi kwenye ufunguzi kuanzia Agosti 24 hadi Septemba 7.

Mwenyekiti wa chama cha Netiboli Mkoa wa Mbeya, Mary Mung’ong’o ameumabia mtandao huu kuwa ligi hiyo inafanyika kwa mara nyingine kutokana na ombi la Waziri Mulugo kwa vile ligi hiyo haikuwa imefana, hivyo akaiomba CHANETA kuwapa Mbeya fursa nyingine ya uwenyeji.

Alisema maandalizi ya ligi yameanza na kusema zinahitajika sh milioni 16 kufanikisha na kuongeza kuwa hadi sasa, hawajajua timu ngapi zitashiriki kutokana na jukumu hilo kuwa chini ya Chama cha Netiboli Tanzania (CHANETA).

Hata hivyo, mwenyekiti huyo ametoa wito kwa viongozi wa ngazi mbalimbli wakiwemo wadau wenye mapenzi na mchezo kutoka mkoani hapa kujitoa kwa hali na mali kuyafanikisha ili yawe chachu ya kukua kwa mchezo huo nchini kwa maslahi ya vijana na taifa.

Aidha, mwenyekiti huyo alitamtambulisha Nwaka Mwakisu kuwa Mwenyekiti wa Kamati ya Maandalizi ya Mashindano hayo.

Akizungumzia mashindano hayo, Mwakisu alisema ni fursa kwa watu wa Mbeya kujitangaza kibiashara kupitia mchezo huo na kufuta makosa yaliyofanyika mwaka jana.

Alisema katika kufakisha mashindano hayo, nguvu ya pamoja inahitajika kuanzia viongozi wa kisiasa, serikari na vyombo vya habari.

MBASPO FC YATWAA UBINGWA WA AIRTEL RISING KWA MKOA WA MBEYA"

Kama kawaidaTimu ya vijana chini ya umri wa miaka 17 ya Mbaspo imefanikiwa kuwa mabingwa wa Airtel Rising Stars mkoa wa Mbeya baada ya kukusanya pointi nne sawa na mahasimu wao Mbosa fc lakini wakiwa na magoli mengi ya kufunga. Timu ya Mbeya Secondari haikupata hata pointi moja katika michuano hiyo ya kusaka vipaji

Mbaspo walianza mbio zao za kutwaa ubingwa kwa kutoshana nguvu ya 3-3 dhidi ya Mbosa siku ya Jumatatu Juni 24 kabla ya kufanya mauaji makubwa ya 6-0 dhidi ya timu dhaifu ya Mbeya Sekondari siku ya Jumanne. Michezo yote imefanyika kwenye uwanja wa Magereza jijini Mbeya.

Mbosa walifikisha point nne juzi Jumatano walipoitandika Mbeya Sekondari 3-0 hivyo kumaliza wakiwa na point nne na magoli sita wakati wapinzani wao Mbaspo wakifikisha jumla ya magoli tisa ya kufunga. Katika mechi ya juzi, magoli ya Mbosa yalitiwa kwenye kamba na Michael Mwashilanga, Riziki Juma na Julius Landa.

Wakati huo huo, chama cha mpira wa miguu mkoa wa Mbeya kimetangaza kikosi cha wachezaji 18 kuuwakilisha mkoa huo kwenye michuano ya Taifa ya Airtel Rising Stars inayoanza kutimua vumbi kwenye uwanja wa Kumbukumbu ya Karume jijini Dar es Salaam kuanzia Julai 2.

Wachezaji hao ni Ismail Yesaya, Emmanuel Alex, Gift Sanga, Jackson Mwaibambe, Boaz Mwangole, Costa Sanga, Seif Zubery, Stanley Angelo, Enock Sikaonga, Kaunda Malata, Joel Kasimila, Hamprey Nyeo, Elia Salengo, Peter Noah, Emmaneul Mtimbi, Michael Bosco, Richard Kalinga na Zamoyoni Mwashambwa. 

Katika mkoa wa Morogoro, mji kasoro bahari, timu ya Moro Kids imetoka sare ya bila kufungana na Techfort katika mchezo wa kushambuliana kwa zamu uliopigwa kwenye uwanja wa shule ya sekondari ya Morogoro juzi Jumatano na kushuhudiwa na mashabiki wengi wa mji huo

Airtel Rising Stars vile vile imeanza kutimua vumbi katika jiji la Mwanza ambapo timu ya Marsh Athletical imedhihirisha umwambe wake katika soka baada ya kuifunga Nyamagana United 2-0 kwenye uwanja mkongwe wa Nyamagana.

Timu za mikoa zimepangwa kuanza kuwasili jijini Dar es Salaam mwishoni mwa wiki tayari kwa ajili ya kindumbwe ndumbwe cha Airtel Rising Stars ngazi ya taifa katika uwanja wa Kumbukumbu ya Karume. Wachezaji 16 watachaguliwa wakati wa mashindano hayo ili kuunda timu itakayoiwakilisha Tanzania kwenye mashindano ya kimataifa ya Airtel Rising Stars. Nchi mwenyeji wa michuano hiyo itatangazwa baadaye mwezi ujao.

YANGA YAITAKA TFF IWALIPE KABLA JUMAPIL

WAKATI inasemekana TFF walishalipwa Shilingi Milioni 200 toka kwa Wadhamini wa Ligi Kuu ya Bara, VODACOM, tangu Mwezi uliopita zikiwa ni Zawadi kwa Washindi mbali mbali wa Ligi hiyo, Klabu zimelalamika kutolipwa Zawadi zao na Yanga wametaka walipwe Milioni 70 zao kabla Jumapili.

Zawadi hizo ni kwa ajili ya kumtunukia Bingwa, Yanga, pia wengine wanaostahili ni ni Azam FC, Simba, Kagera Sugar pamoja na Wachezaji mbali mbali wakiwemo Kipa Bora, Mfungaji Bora, ambae ni Kipre Tcheche wa Azam FC, Refa Bora, Kocha Bora na kadhalika.

Hata hivyo, Vodacom inasemekana wameshatangaza Zawadi hizo zitagawiwa mapema Mwezi ujao na hilo limegusiwa pia na TFF ambao wamesema wanaandaa Siku maalum ya kutoa Zawadi hizo ikiwa ni pamoja na kualika Maafisa wa Serikali pamoja na wale kutoka Wizara husika hasa Wizara ya Habari, Vijana, Utamaduni na Michezo.

Msimu uliopita hata Simba walicheleweshwa kupata Zawadi yao kama Bingwa baada ya kusubiri karibu Miezi miwili tangu Ligi imalizike ili kupata Tuzo yao.

Yanga walitwaa Ubingwa wa Ligi Kuu Vodacom kwa Msimu wa 2012/13 uliomalizka Mwezi Mei lakini wao walitwaa Ubingwa huo mapema kabla Msimu huo haujafika tamati.

WAWILI WALA SHAVU WACHAGULIWA KITUO CHA VIPAJI ASPIRE

Wachezaji wawili kutoka Tanzania wamechaguliwa miongoni mwa 50 waliofanyiwa majaribio nchini Uganda kwa ajili ya kuingia katika kituo cha kuendeleza vipaji (centre of excellence) kilichoko Doha nchini Qatar kupitia mpango wa kukuza vipaji wa Aspire Football Dream.

Abdulrasul Tahir Bitebo (15) ambaye ni mshambuliaji kutoka Kituo cha Uwanja wa Karume, na Martin Omela Tangazi (14) ambaye ni beki kutoka Kituo cha Ukonga ndiyo waliochaguliwa kutoka Tanzania kuingia katika kituo ambapo watakaa kwa mwezi mmoja kabla ya kusaini mkataba rasmi wa kuendelezwa.

Wachezaji wengine walikuwa wakitoka katika nchi za Uganda na Kenya. Mchezaji mwingine aliyefuzu katika nafasi tatu zilizokuwepo ni kutoka nchini Kenya.

Mpango wa Aspire Football Dream unafadhiliwa na Mtoto wa Mfalme wa Qatar katika nchi 16 duniani, na kwa hapa nchini uko chini ya Idara ya Ufundi ya Shirikisho la Mpira wa Miguu Tanzania (TFF).

TFF ina jumla ya vituo 14 vya kuendeleza vipaji kupitia mpango huo wa Aspire Football Dream. Vituo hivyo ni Karume, Kigamboni, Tandika, Kawe, Ukonga, Kitunda, Mbagala, Magomeni, Makongo, na Tabata vilivyo katika Mkoa wa Dar es Salaam. Vingine ni Bagamoyo kilichopo mkoani Pwani, Morogoro, Arusha na Moshi mkoani Kilimanjaro.

Kituo kingine cha kuendeleza vipaji (centre of excellence) cha Aspire kipo Dakar nchini Senegal.

TFF KUENDESHA KOZI SITA KATI YA JULAI- SEPTEMBA

Shirikisho la Mpira wa Miguu Tanzania (TFF) litaendesha kozi sita tofauti za mpira wa miguu kati ya Julai na Septemba mwaka huu.

Kozi hizo ni FIFA 11 For Health itakayofanyika Hombolo mkoani Dodoma kuanzia Julai 8 hadi 19 mwaka huu. Julai 6 hadi 15 mwaka huu kutakuwa na kozi ya mpira wa miguu wa ufukweni (Beach Soccer) itakayofanyika jijini Dar es Salaam.

Waamuzi wa FIFA nao watakuwa na kozi itakayofanyika kati ya Agosti 22 hadi 26 mwaka huu jijini Dar es Salaam wakati kozi ya ukocha kwa ajili ya Copa Coca-Cola itafanyika jijini Dar es Salaam kati ya Agosti 12 na 17 mwaka huu.

Vilevile kutakuwa na kozi ya mpango wa grassroots unaolenga wachezaji mpira wa miguu (wasichana na wavulana) wenye umri kuanzia miaka 6-12 itafanyika kuanzia Septemba 9 hadi 13 mwaka huu jijini Dar es Salaam wakati tamasha (festival) la grassroots litafanyika Uwanja wa Karume, Septemba 14 mwaka huu.

RCL KUKAMILISHA HATUA YA NNE JUMAPILI

Mechi za marudiano za hatua ya nne ya Ligi ya Mabingwa wa Mikoa (RCL) zitachezwa Jumapili (Juni 30 mwaka huu) kwenye viwanja vya Sokoine jijini Mbeya, na Kambarage mjini Shinyanga.

Friends Rangers ya Dar es Salaam ambayo katika mechi ya kwanza ilifungwa nyumbani mabao 3-0 itakuwa mgeni wa Stand United FC mjini Shinyanga wakati Kimondo SC itaikaribisha Polisi Jamii ya Mara jijini Mbeya. Katika mechi ya kwanza timu hizo zilitoka sare ya mabao 2-2.

Hatua ya mwisho ya RCL itachezwa Julai 3 mwaka huu kwa mechi za kwanza wakati zile za marudiano zitafanyika Julai 7 mwaka huu. Timu tatu za kwanza zitapanda daraja kucheza Ligi Daraja la Kwanza (FDL) msimu ujao.

Boniface Wambura

Ofisa Habari

Shirikisho la Mpira wa Miguu Tanzania (TFF)